Fındıq yığımı, qurudulması və saxlanması

Fındıq yığımına başlamazdan əvvəl plantasiyada alaq otları və artıq tullantılar təmizlənir. Əgər cərgə aralarında ot bitkiləri əkilibsə, onlar aşağıdan biçilir və sahədən çıxarılır. Bu tədbirlər yerə tökülmüş fındıqların daha asan və itkisiz yığılmasına şərait yaradır.
Fındıqlar həm əl üsulu ilə, həm də xüsusi fındıqyığan maşınların köməyi ilə toplanır.
Yığılan fındıqlar günəş altında və ya yaxşı havalandırılan quru otaqlarda sərilərək qurudulur. Qurutma zamanı fındığın xarici yaşıl örtüyü quruyur və sonradan asanlıqla ayrılır.

Əgər təsərrüfatda qabıqayıran xüsusi avadanlıq yoxdursa, fındıqlar örtükdən döyülmə üsulu ilə ayrılır. Böyük örtük qalıqları sıx dişli dırmıqlar vasitəsilə təmizlənir, xırda hissələr isə sovurma və ya ələmə yolu ilə ayrılır.
Tədarük məntəqələrinə təhvil verilən fındığın nəmliyi 12%-dən çox olmamalıdır.
Bu rütubət səviyyəsinə fındıqların 5 sm qalınlığında qat şəklində sərilməsi, 16–21°C temperaturda qurudulması və gündə bir dəfə qarışdırılması şərti ilə təxminən 8–9 gün ərzində nail olmaq mümkündür.

Əgər bu şəraitdə qurutma müddəti daha uzun davam etdirilərsə, fındığın nəmliyi 3–4%-ə qədər azala bilər.
Yağışlı və rütubətli havalarda fındıq xüsusi quruducularda və ya temperaturu 40°C-dən yüksək olmayan qızdırılan otaqlarda qurudulur.
Nəmliyi 12% olan fındıqlar tədarük müəssisələrinə təhvil verilir və ya anbarlarda saxlanılır. Anbarlarda fındıqlar kisələrdə və ya qutularda 1 metrə qədər qalınlıqda yığılır.

Qutularda saxlanılan fındıqlar vaxtaşırı qarışdırılaraq havalandırılır.
Fındıq daşınma üçün əlverişli məhsuldur və uzun məsafələrə nəql edilə bilir. Bu xüsusiyyət onu digər meyvəçilik məhsullarından üstün edən əsas amillərdən biridir.

Düzgün saxlama şəraitində fındıq 3 ilə qədər öz dad keyfiyyətlərini itirmədən qala bilər.
Fındıq istehsalının iqtisadi səmərəliliyi kifayət qədər yüksəkdir və digər çoxillik meyvə bitkilərinin istehsalı ilə müqayisədə daha gəlirli hesab olunur.
Fındığın yığılması və təmizlənməsi proseslərinin mexanikləşdirilməsi məhsulun maya dəyərini azaldır, vaxtında və itkisiz yığım hesabına isə rentabelliyi və ümumi məhsul həcmini artırır.